KAMMAGIITTA - FRI FOR MOBBERI PILLUGU

Nikassaasarnermik pinaveersaartitsineq, taamaattoqartillugulu ikiuinissaq meeqqat, ilinniartitsisut, perorsaasut angajoqqaallu ataatsimut akisussaaffigaat. Nikassarneqarneq meeqqamut itisuumik sunniuteqartarpoq, aammattaaq meeraqatigiinnut ataatsimut isigalugu ajoqutaasarluni, nikassaasarneq akornanni atugaasarpat.  Taamaattumik illit angajoqqaajusutut qisuariartariaqarputit paasinnikkuit/misigigukku illit nammineq meeqqat imaluunniit meeqqat allat meeqqanik paaqqinnittarfimmi, atuarfimmi fritidsklubbimiluunniit nikassarneqartoq.

 

Kammagiitta - Fri for Mobberip illit ikiussavaatit illit nammineq meeqqavit ikinngutaasalu akornanni nikassaasarnerup akiorniarnissaaanik ikiuunninni.

 

Kammagiitta - Fri for Mobberi tassaavoq kufferti perorsaanermut tunngasunik sakkussanik imalik soorlu oqaloqatigiinnermi atugassat tavlit, tagiartuineq, rytmikki atuakkallu, taakku illit suliamut tunngasutigut suliaqartuusutut meeraqatigiit akornanni nikassaasarnerannik pinaveersaartitsininni sakkussaraatit.  Aamma facebookgruppetinnut ilanngussinnaavutit.

 

Kammagiitta - Fri for Mobberi Kalaallit Nunaanni atuutilersinneqarpoq meeqqanut paaqqinnittarfinni amerlanerpaani, meeqqallu atuarfiini minnerni 2011-mi. Illit angajoqqaajusutut perorsaasut ilinniartitsisullu meeraqatigiinnik isumaaluutitit pillugit oqaloqatigisinnaavatit, aamma apersorsinnaavatit kufferti ilitsersuutaalu qanoq atortarneraat. Eqqaamasiuk nikassaasarnermik akiuiniarneq tassaammat pinaveersaartitsineq, taamaattumik meeqqavit perorsaasui, ilinniartitsisui angajoqqaallu allat Kammagiitta - Fri for Mobberi pillugu oqaloqatigisakkit – aamma nikassaasoqarneranik pasitsaassaqanngikkaluarlutit.

 

Mary Fondenip aamma Red Barnetip, Ataqqinartorsuup Kunngissap nuliata Maryp suliamik aallartitsinerata kingorna ineriartortissimavaat. Australiami The Alannah and Madeline Foundationip nikassaasarneq akiorniarlugu suliniarnerat suliamut isumassarsiaavoq.

Kammagiitta - Fri for Mobberi tapersersorneqarpoq ukunannga: Royal Arctic, Kanukoka, Naalakkersuisut, Kommune Kujalleq, Qeqqata Kommunia, Qaasuitsup Kommunia, Kommuneqaffik Sermersooq aamma LEGO Fonden.

 

Kammagiitta - Fri for Mobberi ukununnga atugassiaavoq:

 

• Meeqqat paaqqinnittarfinniittut aamma 0.- 2. klassit

• Taakku angajoqqaavi

• Meeqqanik paaqqinnittarfinni meeqqanilu atualerlaani minnerni perorsaasut ilinniartitsisullu

 

Programmip pingaartitaraa meeqqat aalajangeeqataasinnaanerat, aamma pinngitsuugassaanngitsumik anqangajoqqaanik perorsaasumik ilinniartitsisumillu suleqateqarneq.

 

Kammagiitta - Fri for Mobberi ima tunngaveqarpoq:

 

• meeqqat akornanni nikassaaruttarneq inersimasut akisussaaffigaat

• nikassaasarneq akiorniarlugu pinaveersaartitsinermik suliaqarnisssaq pisariaqarpoq

• nikassaasarnermi isiginnaartuuinnartartut akuliuttarnissaat

• meeraqatigiit akornanni ineriartornissaq imminnut akuersaaqatigiinnermik, ataqqinninnermik, isumassornermik, qunusuitsuunermik toqqissisimanermillu tunngaveqartumik

 

Bamsi Kammak Kammagiitta - Fri for Mobberimut ilisarnaataalluni maskortiuvoq. Taassuma toqqissisimaneq, isumassuineq ikinngutigiinnerlu oqariartuutigai, meeqqallu imminnut paarilluarnissaannik ikinngutigiilluarnissaannillu eqqaamasittarlugit.